প্রভাতাযাং তু শর্বর্যাম্
বিশ্বামিত্রো মহামুনিঃ ।
অভ্যভাষত কাকুত্স্থৌ
শযানৌ পর্ণসংস্তরে ॥1
কৌসল্যা সুপ্রজা রাম
পূর্বা সন্ধ্যা প্রবর্ততে ।
উত্তিষ্ঠ নরশার্দূল
কর্ত্তব্যং দৈবমাহ্নিকম্ ॥2
তস্যর্ষেঃ পরমোদারম্
বচঃ শ্রুত্বা নরোত্তমৌ ।
স্নাত্বা কৃতোদকৌ বীরৌ
জেপতুঃ পরমং জপম্ ॥3
কৃতাহ্নিকৌ মহাবীর্যৌ
বিশ্বামিত্রং তপোধনম্ ।
অভিবাদ্যাভিসংহৃষ্টৌ
গমনাযাভিতস্থতুঃ ॥4
তৌ প্রযাতৌ মহাবীর্যৌ
দিব্যাং ত্রিপথগাং নদীম্ ।
দদৃশাতে ততস্তত্র
সরয্বাঃ সঙ্গমে শুভে ॥5
তত্রাশ্রমপদং পুণ্যম্
ঋষীণামুগ্রতেজসাম্ ।
বহুবর্ষসহস্রাণি
তপ্যতাং পরমং তপঃ ।
তং দৃষ্ট্বা পরমপ্রীতৌ
রাঘবৌ পুণ্যমাশ্রমম্ ।
ঊচতুস্তং মহাত্মানম্
বিশ্বামিত্রমিদং বচঃ ॥6,7
কস্যাযমাশ্রমঃ পুণ্যঃ
কো ন্বস্মিন্ বসতে পুমান্ ।
ভগবন্ শ্রোতুমিচ্ছাবঃ
পরং কৌতূহলং হি নৌ ॥8
তযোস্তদ্বচনং শ্রুত্বা
প্রহস্য মুনিপুঙ্গবঃ ।
অব্রবীচ্ছ্রূযতাং রাম
যস্যাযং পূর্ব আশ্রমঃ ॥9
কন্দর্পো মূর্তিমানাসীত্
কাম ইত্যুচ্যতে বুধৈঃ ।
তপস্যন্তমিহ স্থাণুম্
নিযমেন সমাহিতম্ ।
কৃতোদ্বাহং তু দেবেশম্
গচ্ছন্তং সমরুদ্গণম্ ।
ধর্ষযামাস দুর্মেধা
হুঙ্কৃতশ্চ মহাত্মনা ॥10,11
অবদগ্ধস্য রৌদ্রেণ
চক্ষুষা রঘুনন্দন ।
ব্যশীর্যন্ত শরীরাত্ স্বাত্
সর্বগাত্রাণি দুর্মতেঃ ॥12
তস্য গাত্রং হতং তত্র
নির্দগ্ধস্য মহাত্মনা ।
অশরীরঃ কৃতঃ কামঃ
ক্রোধাদ্দেবেশ্বরেণ হি ॥13
অনঙ্গ ইতি বিখ্যাতঃ
তদাপ্রভৃতি রাঘব ।
স চাঙ্গবিষযঃ শ্রীমান্
যত্রাঙ্গং প্রমুমোচ হ ॥14
তস্যাযমাশ্রমঃ পুণ্যঃ
তস্যেমে মুনযঃ পুরা ।
শিষ্যা ধর্মপরা নিত্যম্
তেষাং পাপং ন বিদ্যতে ॥15
ইহাদ্য রজনীং রাম
বসেম শুভদর্শন ।
পুণ্যযোঃ সরিতোর্মধ্যে
শ্বস্তরিষ্যামহে বযম্ ॥16
অভিগচ্ছামহে সর্বে
শুচযঃ পুণ্যমাশ্রমম্ ।
স্নাতাশ্চ কৃতজপ্যাশ্চ
হুতহব্যা নরোত্তম ॥17
তেষাং সংবদতাং তত্র
তপোদীর্ঘেণ চক্ষুষা ।
বিজ্ঞায পরমপ্রীতা
মুনযো হর্ষমাগমন্ ॥18
অর্ঘ্যং পাদ্যং তথাঽতিথ্যম্
নিবেদ্য কুশিকাত্মজে ।
রামলক্ষ্মণযোঃ পশ্চাত্
অকুর্বন্নতিথিক্রিযাম্ ॥19
সত্কারং সমনুপ্রাপ্য
কথাভিরভিরঞ্জযন্ ।
যথার্হমজপন্ সন্ধ্যাং
ঋষযস্তে সমাহিতাঃ ॥20
তত্র বাসিভিরানীতা
মুনিভিঃ সুব্রতৈঃ সহ ।
ন্যবসন্ সুসুখং তত্র
কামাশ্রমপদে তদা ॥21
কথাভিরভিরামাভিঃ
অভিরামৌ নৃপাত্মজৌ ।
রমযামাস ধর্মাত্মা
কৌশিকো মুনিপুঙ্গবঃ ॥22
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ত্রযোবিংশস্সর্গঃ॥
